ភាពអស្ចារ្យ៨ចំណុចនៃអច្ឆរិយវត្ថុប្រាសាទអង្គរវត្ត ដែលអ្នកមិនធ្លាប់ដឹង
ចុះផ្សាយថ្ងៃ ព្រហស្បតិ៍ ទី ១១ ខែ កុម្ភះ ឆ្នាំ ២០១៦
ប្រាសាទអង្គរវត្តជាប្រាសាទដ៏ល្បីល្បាញមួយដោយក្បូរក្បាច់រចនា និងជាប្រាសាទដែលមានវ័យដ៏ចំណាស់មួយស្ថិតនៅក្នុងខេត្តសៀមរាបនោះ ហើយក៏ជាដួងព្រលឹងនៃព្រះរាជាណាចក្រកម្ពុជាទាំងមូលដែរ ដែលត្រូវបានកសាងឡើងនៅដើមសតវត្សទី១២ ដោយព្រះបាទសូរ្យវរ្ម័នទី២ ហើយបន្សល់ទុកមកដល់ពេលបច្ចុប្បន្ននេះ អស់រយៈកាលរាប់សតវត្សមកហើយ ។
ចំពោះប្រាសាទដ៏ពិសេសនេះ មានលក្ខណៈមួយចំនួនដែលអ្នកមិនធ្លាប់ដឹង ដូច្នេះថ្ងៃនេះគេហទំព័រKqube.net យើងខ្ញុំសូមលើកយកចំណុចពិសេសទាំងនេះមកជូនប្រិយមិត្តអាន ទុកជាចំណេះដឹងបន្ថែមចំពោះដួងព្រលឹងនៃព្រះរាជាណាចក្រកម្ពុជា ។ ខាងក្រោមនេះ ជាលក្ខណៈពិសេសទាំង៨ចំណុចនៃប្រាសាទអច្ឆរិយនេះ៖
១. ប្រាសាទអង្គរវត្តត្រូវបានកសាងឡើងដោយថ្មភក់ចំនួន៥លានតោន
ប្រជាជនកម្ពុជាភាគច្រើនមានមាឌតូច ប៉ុន្តែស្អាតសមរម្យបែបធម្មជាតិ ហើយមានសមត្ថភាពក្នុងការជញ្ជូនថ្មមួយដុំៗមានទម្ងន់ជិត១៥០០គីឡូក្រាម ក្នុងចម្ងាយជាង៤០គីឡូម៉ែត្រពីប្រភពថ្ម មកកាន់ទីតាំងប្រាសាទបាន ដូច្នេះហើយគេសន្និដ្ឋានថា មនុស្សជំនាន់ដើមមានគំនិតច្នៃប្រឌិតខ្ពស់ ដោយបណ្ដែតថ្មទាំងនោះតាមខ្សែទឹកទន្លេ ទើបអាចយកមកដល់កន្លែងសង់ប្រាសាទបាន ។
២. ធ្លាប់ជាប្រាសាទឧទ្ទិសដល់សាសនាហិណ្ឌូ
កសាងឡើងដោយព្រះបាទសូរ្យវរ្ម័នទី២ នៅដើមសតវត្សទី១២ ប្រាសាទនេះកសាងឡើងដើម្បីឧទ្ទិសដល់ព្រះវិស្ណុ ដោយចម្លាក់ និងក្បូរក្បាច់រចនាជាច្រើនបានបង្ហាញពីទំនាក់ទំនងរវាងប្រាសាទអង្គរវត្ត និងសាសនាហិណ្ឌូ តែមកដល់ចុងស.វទី១៣ (ប្រភពខ្លះថាស.វទី១៤) ប្រាសាទអង្គរវត្តបានប្រែក្លាយជាប្រាសាទបែបព្រះពុទ្ធសាសនាវិញ បន្ទាប់ពីមានជម្លោះផ្នែកសាសនាដ៏ខ្លាំងក្លានៅសម័យនោះ ។ មកទល់ពេលនេះ ប្រាសាទអង្គរវត្តនៅតែត្រូវបានគេចាត់ទុកជាប្រាសាទបែបព្រះពុទ្ធសាសនាដដែល ប៉ុន្តែក៏មានបន្សល់ទុកចម្លាក់ និងអ្វីៗផ្សេងដែលបង្ហាញពីសាសនាហិណ្ឌូដែរ ។
៣. ក្រុមហ៊ុន Paramount Pictures ចំណាយ១ថ្ងៃ១ម៉ឺនដុល្លារដើម្បីសុំសិទ្ធថតកុននៅប្រាសាទបាយ័ន
កាលពីឆ្នាំ២០០០ ក្រុមហ៊ុនខ្សែភាពយន្តលំដាប់ថ្នាក់អន្តរជាតិមួយនេះ បានយកតំបន់ស្ថាបត្យកម្មប្រាសាទអង្គរធ្វើជាកន្លែងថតរឿង Lara Croft: Tomb Raider សម្ដែងដោយអ្នកនាង Angelina Jolie ដែលកាលនោះក្នុងមួយថ្ងៃក្រុមហ៊ុនខ្សែភាពយន្តនេះត្រូវចំណាយ១ម៉ឺនដុល្លារ និងប្រើពេលអស់៧ថ្ងៃទើបថតចប់ ហើយវាបានផ្ដល់ជាចំណូលដល់អ្នកស្រុករស់នៅជុំវិញនោះរាប់ម៉ឺនដុល្លារ មិនត្រឹមតែប៉ុណ្ណោះ អ្នកនាង Angelina Jolie នៅបានទទួលចិញ្ចឹមក្មេងកំព្រាម្នាក់ទៀតផង ។
៤. ប្រាសាទ Angkor Wat គឺជាសំណង់ស្ថាបត្យកម្មសាសនាធំជាងគេបំផុតក្នុងលោក
គ្រាន់តែប្រាសាទអង្គរវត្តមួយមានទំហំធំជាងបុរី Vatican City ដល់ទៅ៤ដង ហើយបើគិតទីក្រុងអង្គរទាំងមូលវិញ គេប្រើថ្មសាងសង់អស់ច្រើនជាង ថ្មសរុបសម្រាប់សង់ប្រាសាទពីរ៉ាមីតទាំងអស់នៅអេហ្ស៊ីបទៀត ។
៥. ចំណាយពេលអស់៣៥ឆ្នាំ កម្លាំងមនុស្ស៣០ម៉ឺននាក់ និងដំរី៦ពាន់ក្បាលដើម្បីសាងសង់ប្រាសាទអង្គរវត្ត
ដើម្បីកសាងមហាអច្ឆរិយប្រាសាទនេះ បុព្វបុរសខ្មែរចំណាយអស់ទាំងកម្លាំងកាយ កម្លាំងចិត្ត និងប្រាក់អស់ជាច្រើន ហើយក្នុងនោះរយៈពេលនៃការសាងសង់ក៏ត្រូវចំណាយពេលយូរដែរ ក្នុងនោះដំរីជាយានជំនិះដ៏សំខាន់ក្នុងការធ្វើដំណើរ ដោយគេប្រើដំរីសម្រាប់អូសសម្ភារៈធ្ងន់ៗជាដើម ។
៦. ធ្លាប់ជាទីក្រុងធំជាងគេបំផុតក្នុងពិភពលោក
ប្រាសាទអង្គរវត្តត្រូវបានសាងសង់ឡើងក្នុងក្រុងអង្គរ ដែលជារាជធានីនៃអាណាចក្រខ្មែរ ហើយត្រូវបានគេប៉ាន់ប្រមាណថា កាលពីសម័យអតីតកាល ក្រុងអង្គរមានប្រជាជនដល់ទៅជាង១លាននាក់ ដែលនេះជាចំនួនដ៏ច្រើនបំផុតមួយក្នុងប្រវត្តិសាស្ត្រ មុននឹងមានបដិវត្តឧស្សាហកម្មពិភពលោកនៅស.វទី១៨ ដល់ទី១៩ ។ ជាក់ស្ដែងការប្រើកាំរស្មីឡាស៊ែរបាញ់ទៅលើប្រាសាទអង្គរ បង្ហាញឲ្យឃើញថា តំបន់ស្នូលនៃក្រុងអង្គរធ្លាប់មានមនុស្សរស់នៅដល់ទៅ៥០ម៉ឺននាក់ ខណៈដែលនៅក្រៅតំបន់ស្នូលនេះមានច្រើនជាងនេះទៀត ។
៧. បុរាណវិទូរកឃើញអាថ៌កំបាំងជាច្រើននៅក្រោមប្រាសាទអង្គរវត្ត
នៅឆ្នាំ២០១២ បុរាណវិទូមួយក្រុមបានប្រើបច្ចេកវិទ្យាឡាស៊ែរ LiDAR បាញ់ពីលើអាកាសសំដៅមកលើបរិវេណប្រាសាទអង្គរវត្ត រកឃើញសំណង់ក្រោមដីជាច្រើនដ៏អាថ៌កំបាំង ដែលគេអាចសន្មតបានថា ប្រាសាទអង្គរវត្តមានអាថ៌កំបាំងច្រើនជាង អ្វីដែលពិភពលោកអាចនឹកស្មានដល់ ។
៨. មានចម្លាក់រូបឌីណូស័រនៅលើប្រាសាទតាព្រហ្ម
អាថ៌កំបាំងមួយទៀតនៃស្ថាបត្យកម្មក្រុងអង្គរនេះគឺ រូបឌីណូស័រដែលបុព្វបុរសខ្មែរឆ្លាក់នៅលើប្រាសាទតាព្រហ្ម ប៉ុន្តែមកទល់ពេលនេះ គេនៅមិនទាន់រកចម្លើយឃើញនៅឡើយទេថា ហេតុអ្វីបានជាអាចមានចម្លាក់បែបនេះកើតឡើង ព្រោះថាបើប្រៀបធៀបតាមរយៈពេល ប្រាសាទតាព្រហ្មត្រូវបានសង់ក្រោយសត្វឌីណូស័រដាច់ពូជជាយូរយារណាស់មកហើយ ។ (ប្រភព Guiddoo)
ផ្ដល់សិទ្ធិដោយ៖ KQUBE
http://www.knn-news.com/news/196/222/9234
បានផ្សាយបន្ត ដោយ និស្សិត ឈឹម ផាន់ណា
0 comments:
Post a Comment